بەیانامەییەك لە دەستەی ژنانی چالاكی راپەرینەوە

‌‌بەداخەوە دوبارە هەواڵی كوشتن‌و سەربڕینی ژنێكی گوندی گردجانی سەر بە ناحیەی چوارقونە, هەموومان دەخاتە بەردەم تاسە‌و خەم‌و زامێكی قوڵی نەریتی كۆنەپارێزی‌و رەفتاری دڕندە ئاسای دواكەوتویەوە. كوشتن‌و لێدان‌و توندوتیژی بەرامبەر ژنان یەكێكە لە قێزەونترین ‌و ناشیرینترین رەفتار‌و دیاردەكانی كۆمەڵگا كە بەرەنگاربوونەوەی هەموومان دەخاتە بەردەم بەرپرسیەتیەكی مێژووییەوە.
نیوە شەوی 7/8ی مانگی 12 ساڵی 2009 لە گوندی گردجان خاتوو (تریفە محمد ئیسماعیل)لە دایك بووی ساڵی (1981) كە خاوەنی سێ‌ منداڵی چاو گەش بووە بەناوەكانی ( گلێنەو ترێ‌ و گەیلان) بە شێوەیەكی زۆر دڕندانە‌و دوور لە هەموو ویژدان‌و هەستێكی مرۆڤانە دەخنكێرنێت‌و دواتر سەر دەبردرێت, تریفە كە لەو كاتەدا سكی هەبووە و مناڵێكی دوو مانگی لە سكیدا بووە, بە شێوەیەكی هێندە نامرۆڤانە دەكوژرێت كە هەموو ویژدان‌و ئینسانێكی خاوەن هەست رادەچڵەكێنێت. ئەو رەفتاڕو دڕندەییە, نیشانەی ئەو پەری جەهالەتە كە پێویستە لە لایەن تەواوی رێكخراوەكانی كۆمەڵگای مەدەنی‌و چینی رۆشنبیران‌و دامودەزگاكانی دەوڵەت‌و تەواوی كۆمەڵگاوە مەحكوم‌و ریسوا بكرێت‌و هەوڵی جدی بدرێت تا تاوانبارانی ئاشكرا بكرێت و بە سزای توندی یاسایی بگەیەنرێن.
ئێمە لە (دەستەی ژنانی چالاكی راپەرین) وێرای ئەوەی زۆر بە توندی ئیدانەی ئەو روداوە دەكەین‌و تاوانبارانی ریسوا‌و شەرمەزار دەكەین لە هەمانكات هەوڵی دامودەزگاكانی ئاسایش‌و پۆلیس‌و نوسینگەی بەدواداچوونی توندوتیژی بەرامبەر بەژنان بەرز هەڵدەسەگێنین كە لە سەرەتای زانینی كارەساتەكەوە, بەوپەری هەستكردن بە بەرپرسیاریەتیەوە بەدوای ئاشكراكردنی روداوەكەو دۆزینەوەی تاوانبارانەوەن. هیوا دەكەین هەرچی زووە ئەنجامی لێكۆڵینەوەكان لە كۆنگرەیەكی رۆژنامەنوسی بۆ هەموو لایەك رابگەیەنرێت‌و تاوانبارانی بە خەڵك بناسرێن‌و سزای توندی یاسایی بدرێن.
لە راستیدا ئەو كارەساتە تەنها روداوێك نییە لەبەرامبەر ژنێكی بێگوناهی وەك خاتوو تریفە ئەنجام درابێت, بەڵكو بە پێچەوانەوە دەیان و سەدان روداوی تری دڵتەزێنمان دەخاتەوە بەر چاو كە بە بڕو بیانوو پاساوی نابەجێ‌ لە بەرامبەر ژناندا ئەنجام دەدرێن. ئەمەش هەڕەشەو زەنگێكی مەترسیدارە بۆ سەر تەواوی كۆمەڵگاكەمان كە پێویستە بە زووترین كات سنوری بۆ دابنرێت‌و لە ئاستێكی فراوانتری جەماوەری‌و دەوڵەتی‌و یاسایی‌و رێكخراوەییدا ریسواو شەرمەزار بكردرێن.

نەفرەت لە تاوانباران‌و تاریك پەرستان .
درود بۆ گیانی پیرۆزی خاتوو تریفەو سەرجەم قوربانیانی دەستی جەهالەت‌و پیاوسالاری .
دەستەی ژنانی چالاكی راپەرین
10/12/2009