پارێزه‌ران هه‌ڕه‌شه‌ی‌ دركاندنی‌ راستییه‌كان ده‌كه‌ن

‌‌بورهان قادر
له‌به‌رانبه‌ر بڕیارێكی‌ ئه‌نجومه‌نی‌ دادوه‌ری‌، ژماره‌یه‌ك مافپه‌روه‌ر‌و پارێزه‌ر، دوو یاداشتی‌ ناڕه‌زاییان ئاراسته‌ی‌ سه‌رۆكی‌ هه‌رێم كردووه‌‌و داوای‌ بینینی‌ ده‌كه‌ن، به‌ڵام تائێستا وه‌لاَمیان نه‌دراوه‌ته‌وه‌، ئه‌وانیش هه‌ڕه‌شه‌ی‌ ئاشكراكردنی‌ راستییه‌كان ده‌كه‌ن ئه‌گه‌ر وه‌لاَمیان نه‌درێته‌وه‌.

دوو یاداشته‌كه‌ی‌ ئه‌و مافپه‌روه‌‌و پارێزه‌رانه‌، له‌كۆتایی مانگی‌ ده‌‌و ناوه‌ڕاستی‌ مانگی‌ یانزه‌ی‌ ئه‌مساڵدا، ئاڕاسته‌ی‌ سه‌رۆكایه‌تی‌ هه‌رێم كراوه‌‌و دواتر داوای‌ بینینی سه‌رۆكی‌ هه‌رێم كراوه‌، بۆ ئه‌وه‌ی‌ له‌بڕیارێكی‌ ئه‌نجومه‌نی‌ دادوه‌ری‌ ئاگاداری‌ بكه‌نه‌وه‌، كه‌ به‌بڕیاری‌ حیزب ژماره‌یه‌ك كه‌سیان كردووه‌ته‌ دادوه‌ر.

له‌و یاداشت‌و نووسراوانه‌ی‌ ئاراسته‌ی‌ سه‌رۆكی‌ هه‌رێم كراوه‌‌و واژۆی‌ 31 مافپه‌روه‌ر‌و پارێزه‌ری‌ له‌سه‌ره‌، تێیدا هاتووه‌ »دوای‌ ئه‌وه‌ی‌ ئه‌نجومه‌نی‌ دادوه‌ری‌ رایگه‌یاند كه‌ بۆ پێویستی‌ به‌دادوه‌ر هه‌یه‌، دواتر تاقیكردنه‌وه‌ی‌ ته‌حریری‌ به‌128 مافناس كرا، ئێمه‌‌و ژماره‌یه‌كی‌ تر له‌تاقیكردنه‌وه‌ی‌ ته‌حریری‌ ده‌رچووین، به‌لاَم هێشتا تاقیكرده‌وه‌ی‌ زاره‌كیمان نه‌كردبوو، له‌سه‌ر بنچینه‌ی‌ حیزب‌و په‌یوه‌ندی‌ كه‌سی‌‌و دوور له‌شاره‌زایی‌، بڕیاری‌ یه‌كلاییكه‌ره‌وه‌ بۆ 56 كه‌س له‌وانه‌ درابوو كه‌ بوونه‌ته‌ دادوه‌ر».

یه‌كێك له‌و پارێزه‌رانه‌ به‌ هاولاَتی‌ راگه‌یاند »ئێستا تێگه‌یشتووین ئه‌و تاقیكردنه‌وانه‌ی‌ ئێمه‌ كردوومانه‌ هه‌مووی‌ رۆتینیات بووه‌‌و حیزب به‌ئاره‌زووی‌ خۆی‌، ئه‌و ژماره‌ دادوه‌ره‌ی‌ له‌سه‌ر ئه‌نجومه‌نی‌ دادوه‌ری‌ كردووه‌ته‌ بڕیار».

وتیشی‌ »ئه‌وه‌ی‌ ئێمه‌ی‌ زیاتر نیگه‌رانكردووه‌، وه‌لاَمنه‌دانه‌وه‌‌و پشتگوێخستنی‌ داواكانی‌ ئێمه‌یه‌، بۆیه‌ ده‌مانه‌وێت جه‌نابی‌ كاك مه‌سعود ببینین تا له‌نزیكه‌وه‌ هه‌موو ناحه‌قییه‌كانی‌ تێبگه‌یه‌نین، ئه‌گه‌ریش وه‌لاَممان نه‌داته‌وه‌، له‌كه‌ناڵه‌ عه‌ره‌بییه‌كانه‌وه‌ هه‌موو راستییه‌كان ده‌دركێنین‌و ده‌چینه‌ لای‌ سه‌فاره‌ته‌كانیش، چونكه‌ له‌ناو یاسا پێشێلی‌ یاسا كراوه‌».