هەموو شتێك دووانەو كێشەش سامانە/ ئارام جوامێری

‌‌ئەگەر خوێندنەوەیەك بكەین بەمێژووی ئەدای دوو حیزبە دەسەڵاتدارەكەی كوردستانەوە، لە دوای دروستكردنی یەكەمین حكومەتی خۆماڵی كە ئەویش هەر بەدوانەیی لە دایكبوو، لەوكاتەوە ڕێچكەی دوانەیی گرتووەو گەورەترین كێشەش ڕێكنەكەوتنە لەسەر پارە و كۆی مسەلەكان نەك لەسەر بنەمای تەبایی و بەرژەوەندی میللەت بەدوانەیی متبوبن بەڵكو مەسەلە قبوڵنەكردنی یەكترەو هیچیتر.
دوانە لەناو سروشتدا شتێكی نایاب و سەرنجڕاكێشە و خەڵك بە جوان و تاك وەسفی دەكات، وەك خەیار بە دوانەیی، مازوو، گێلاس، هەتا لە ناو ژیانی مرۆڤدا منداڵ بەدوانەیی لە دایك دەبێت، بەڵام نەمان وت سیفەتی دوانەیی سروشت بگوازنەوە بۆ ناو كۆی دامەزراوەكانی میری و كاری حیزبایەتی و حكومەت، بەجۆرێك هەتا ئێستاش بەدەست كاریگەرییە خراپەكانی ئەم دوانەییە دەناڵێنین، دوو سەرۆكی هەرێم واتا جێگرەكەشی كە هەر كەسەو لەناوچەی نفوزی حیزبەكەی سەرۆكە و دەسەڵاتدارەو هەریەكەشیان لەناوچەكەی یەكتریان ڕەمزین و حیسابی بۆ ناكرێت، ئەمەش كاریگەری خراپی بۆ سەر هەردوو ناوچەكە هەیەو دواجار هەر میللەت دەبێت باجەكەی بدات، لەسەرەوە بەدوانەیی هاتۆتە خوارەوە، بۆنمونە دوو حكومەت، دوو ئیدارەیی، دوو سەرۆكی پەرلەمان واتا سەرۆك و جێگر، دوو لیستی لێكدراو ( لیستی كوردستانی )، دوو وتەبێژی یەك لیست وەك لە هەڵبژاردنی پەرلەمانی تەموزی ڕابردوو بینیمان، دوو دیوانی چاودێری دارایی، دوو بەرەی دژییەك، دوو جۆر خزمەتگوزاری، دوو دەزگای سیخوڕی پاراستن و زانیاری، دوو دەزگای ئاسایش، دوو جۆر دەزگای ڕاگەیاندنی پێچەوانە، دوو خۆ بەخەمخۆرزان كە خەمخۆری میللەت نین، ڕێككەوتنی دوو حیزبی لە پێناو سامانی گشتی ( ستراتیژی )، دوو پۆستی ئیداری و حكومی و حیزبی... هتد، لەسەروی هەموو ئەمانەدا دوو (( ڕوویی لەگەڵ میللەت )).
هۆكاری دوانەیی و كاریگەرییەكانی، هەموومان دەزانین كە ئەم دوو پارتە دەسەڵات بەدەستە لەسەر دابەشكردنی داهات و سەروەت و سامانی گشتی پێك نەدەهاتن و وەكو مرۆڤی نەوسن كەوتنە دژییەك هەر ئەم بەشێكی زۆرتری لە داهاتی گومرگ و باج دەیویست بۆخۆی داببڕی و ئەو بەشێكی زیاتری بۆ خۆی دادەبڕی ئەمەش لەسەر حیسابی میللەت، ئەوان شەڕیان بوو لەسەر داهاتی كوردستان ئێمەش بەبێئاگایی برای خۆمان دەكرد بە دوژمن و خوێنمان بۆ ئەوان دەڕشت، ئەوان شەڕی پارە و داهات لێكی هەڵبەزاندنەوە، ئێمەش لەجیاتی یەك دەست بین دوژمنایەتیمان لەسلێمانییەوە گەیشتە برایەك لە هەولێر لەسەر شەڕی براكوژی، كەسمان چاوەڕێی ئەوە نەبوو بەدەستی خۆی كورد بكوژێ‌! و سەرەنجام دوژمنایەتی بخاتە خانەوادەكەیەوە و تا مردن نەحەسێتەوە!
لە ئەنجامی ناكۆكییەكانی ئەم دوو حیزبە باڵا دەستە لەسەر بودجە و داهاتی میللی هەزاران كێشەی سیاسی و كۆمەڵایەتی و هەتا ئابوریشی بە دوای خۆیدا هێنا، زۆر خێزان هەیە بەهۆی دوژمنایەتی لەدوای شەڕی ناوخۆوە هەتا ئیستاشی لەگەڵدابێ‌ ناتوانێ‌ بە سەربەستی سەردانی هەولێر و دهۆك بكات و بە پێچەوانەوە لەوێوە بۆ سلێمانی، رونتر بڵێین لە حكومەتەكەی سلێمانییەوە بۆ حكومەتەكەی هەولێر و بە پێچەوانەشەوە، ئەوەی تەنها باجی لەم پێناوەدا خەڵكی هەژاربوو.
كێ‌ هەبوو بتوانێ‌ تا پێش ساڵی 2003 یش بە ئازادی سەردانی ئیدارەی ژێر دەسەڵاتی پارتی بكات و بسوڕێتەوە و خۆی بەیەكێك لە هاوڵاتیانی كوردی ئەو شارە بزانێ‌ بێگومان كەس! ئەمە دەرەنجامی عەقڵییەتێكی سیاسی كۆنەپارێزی بودەڵی كوشندەبوو كە ئێستاش ئەوەی لێدەخوێنرێتەوە ڕۆژێك ئەو ڕێككەوتنە ستراتیژییەی نێوان ئەم دووانە لێكچووە سیاسیە لێكبترازێ‌ حكومەتیش وەكو حكومەتە دوانەكەی جارانی لێدێتەوەو دەبێتەوە دوو ئیدارە، دەبێ‌ دیسان كورد وتەنی بڵێینەوە: ( ڕیسەكە بۆوە بەخوری ).