هۆكارەكانی چرچبوونی پێست‌و چۆنیەتی چارەسەركردنی/ و: كەژاڵا عەلا

‌‌چرچبوون بریتیە: لە دروست بوونی خەتی نێوان برۆكان‌و سەر ناوچەوان‌و دەور‌وبەری دەم‌و چاو‌و گۆناكان . ئەم نیشانانەش لەو كەسانەی كە جگەرە خۆرن زووتر بەدی دەكرێت كەپێی دەوترێ‌ چرچبوونی پێشوەخت، چونكە جگەرە خواردن ئەبێتە هۆی كەم بوونەوەی ڕێژەی چەوری لە ژێر پێستدا ‌و كەمبوونەوەی ئارەزووی خواردن‌و سەرئەنجام ئەبێتە هۆی خراپی باری تەندرووستی‌و وشكبوونەوە‌و چرچبوونی پێست بەهۆی لەدەست دانی دروست بوونی پڕۆتینی "كۆلاجین". جگە لەمانەش پێستی وشك زووتر لە پێستی چەور ڕووبەڕووی ئەم كێشەیە ئەبێتەوە.
وەك ئاشكرایە پڕۆتینی كۆلاجین گرنگترین پڕۆتینە بۆكاری ڕێكخستن‌و پاراستنی پێست لە ئەندامەكانی لەش‌و ئێسك‌و كڕكڕاگەدا. ئەگەر بێتوو گەشەی كۆلاجین لەلەشدا ڕووبەڕووی نەخۆشی ببێتەوە ئەوا پێست دووچاری تێك چوون‌و چرچ بوونەوە دەبێت.

هەروەها ئاو‌و هەوا، نەخۆشی بۆماوەیی، تیشكی خۆر ، سەركەوتنی تەمەن هۆكارێكە بۆ كەم بوونەوەی پڕۆتینی كۆلاجین لە لەشدا. هەربۆیە كەسانی بەساڵاچوو پێستیان شل دەبێتەوە‌و شێوە لاستیكیەكەی لەدەست دەدات. قەڵەو كاتێك لاواز ئەبێت بەهۆی لە دەست دانی چەوری ژێر پێست دووچاری شلبوونەوەی پێست دەبێت. جگە لە دوورستبوونی كۆلاجین كەسانی تووڕە‌و مڕومۆچ بەهۆی كرژبوونی ماسولكەكانیانەوە زووتر تووشی چرچبوونی پێست دەبن.

چەند خاڵێكی گرنگ بۆ چارەسەركردنی چرچبوونی پێستی دەم‌و چاو:

1_ بەكارهێنانی كرێمی ڕێك خستنی پێست تا ڕادەیەك ئەتوانێت بۆ ماوەیەك چرچی نەهێڵێت لەسەر دەم‌و چاو.
2_ خۆ پاراستن لە تیشكی خۆر.
3_خۆپاراستن لە جگەرە كێشان: چونكە جگەرە كێشان ئەبێتە هۆی خەتی قوڵ لەم لاو لای لێوەكان‌و دەور‌و بەری چاوەكان.
4_ خۆپاراستن لە گرژكردنی ماسولكەكانی پێست لەكاتی ئاخاوتندا چونكە كەسانێكی زۆر هەن لەكاتی گفتو گۆكردندا زیاتر بەهۆی سۆزداریەوە خەت دروست دەبێت لە سیمایاندا، ئەوجۆرە كەسانە لەوانەیە وابزانن كەئەم خەتانە گرنگ نین‌و كاتین بەڵام زۆر بەی كات ئەبنە هۆی دروست بوونی خەتی هەمیشەیی ‌و ئەمێنێتەوە.
5_ لەزۆربەی لێكۆڵینەوەكاندا دەركەوتوە بەكارهێنانی ڤیتامینات ئەتوانێت تا ڕادەیەك پێست بپارێزێت لە چرچ بوون لەنموونەی: ڤیتامینەكانی C‌و A‌و E بەڵام لەهەمان كاتیشدا زۆر بەكارهێنانیان زیانی لێدەكەوێتەوە.
6_لەبەر ئەوەی هۆڕمۆنی (ئیسترۆجین) هۆڕمۆنی سەرەكی ژنانەیە ‌و ڕۆڵی سەرەكی ئەبینێت لە پاراستنی جوانی پێست‌و لاوێتیدا، ئە‌و ژنانەی سووڕی مانگانەیان ڕاوەستاوە واتا( لێچوونەتەوە) لەم ژنانەدا ئاستی ئەم هۆڕمۆنە كەم دەبێتەوە‌و دەبێتە هۆی چِرچ بوونی پێست. بەڵام بەهۆی پزیشكی تایبەتیەوە ئەتوانن چارەسەر بكرێت‌و تا ڕادەیەك ئەم كێشانە كەم بكرێنەوە.

7_ خۆ ڕاهێنان لەگەڵا ژیانێكی سادە‌و تەندروست، خۆبەدوورگرتن لە دڵەڕاوكێ‌و سۆزداری، بۆ پاراستنی پێست گرنگە.
8_ ماساژ كرنی پێست كاریگەری باشی هەیە بەڕێگەی بەكارهێنانی كرێمی تایبەتیەوە لەلایەن پزیشكەوە.

9_ ئەنجام دانی لەیزەر بۆ چارەسەركردنی چرچبوونی پێست كاریگەرە.

10_ تازەترین ڕێگە بۆ چارەسەركردنی چرچبوونی پێست كە لەم دوایەدا دۆزراوەتەوە دەرزیلێدانە بەبەكارهێنانی مادەیەكی تایبەتی بۆ ژێرپێست لەلایەن كەسانی پسپۆر لەم بوارەدا. بەڵام ئەم ڕێگەیەش كاتیە‌و لەڕاستیدا چرچ بوونەكە بۆ هەمیشە لەناو نابات، بەڵكو بۆ ماوەیەكە‌و ئەوەش پەیوەندی هەیە بە جۆری پێستەكەوە، لە هەندێك كەسدا لە 3 تا 9 مانگ دەخاێنێت. دواتر ئەوكەسە دەتوانێت ئەم دەرزیە دووبارە بكاتەوە.
سەرچاوە. سایتی زنان امروز