سەرقاڵكردن و گۆڵكردن / ئارام جوامێری

‌‌لە سەرەتای دامەزرادنەوەی عێراق و پیكهێنانەوەی حكومەتە یەك لە دوا یەكەكانی، لەگەڵ ئەوەی زۆرێك لە پۆستە گرنگ و هەستیارەكان بەدەست كوردەوە بووە، هەر جارە بەشێوازێك لایەنی عێراقی، سیاسییەكانی كوردیان سەرقاڵی كۆمەڵێك شتی بێ‌ بنەما كردووە بۆ ئەوەی بیر لە مافی گەلە ستەمدیدەكەیان نەكەنەوە، هەر لە جێبەجێكردنی مادە دەستورییەكان تا دەگات بە مادەی 140 یش كە چەندین جار بۆ ئەوەی لایەنی كوردی نەچێت بەلای هەوڵی چارەسەری ئەو مادە دەستورییە، هەندێ‌ بابەتی تریان وروژاندووە بۆ ئەوەی كورد سەرقاڵبێت و ئەو مادە دەستوورییە ئیفلیج و ئێكسپایەربێت، بێگومان ئامانجەكەشیان پێكاو ئەوەتا سەركردایەتی كورد تازە داوای پشتگیری ئەمریكا و كۆشكی سپی دەكات.
لەماوەی ڕابردوودا كاتێك لایەنی عێراقی خەریكی پەسندكردن و جێبەجێكردنی شێوازی هەڵبژاردن بوو لە پەرلەمان، كوردەكان شەڕی ڕاگەیاندیان گەرمكردبوو لەسەر كەركوك و ناوچەكانی دەوروبەری، ئەمەش درێژەی نەكێشاو هەر ماوەیەك بوو ئیتر ساردبوونەوە كاتێك بە خۆمان زانی بە ڕۆژی ڕوناك فێڵی ئەوەندە گەورەمان لێكرا ئەگەر چالاكوانانی بزوتنەوەی گۆڕان و ڕۆشنبیران و رۆژنامەنوسان نەبوانایە ئەوە بەدەست بەناو سیاسەتمەدارو سیاسییەكانی كورد لە بەغدا تیا دەچوین، دواتر لەڕێی كارتی ڤیتۆكردنەوەی یاساكە لەلایەن تارق هشمی و كوردەكان توانرا گۆڕانكاری تاڕادەیەك پۆزەتیڤ لە كورسیەكاندا بكرێت. ئەمەش دەرەنجامی سەرقاڵی كورد بەشەڕی پڕوپاگەندەی هەڵبژاردنی داهاتوو لەسەر كەركوك و كەمتەرخەمی نوێنەرانی كورد بوو لە بەغدا.
دیسانەوە بەهۆی سەرقاڵبوون بە زۆری كێشە كەڵەكەبووەكان، كەس باس لە هەڵبژاردنی ئەنجومەنی پارێزگاكان ناكات و هیچ كەسێكیش نازانێ‌ بەچ بڕیارێك و بۆ چ كاتێك دواخراوە؟ بۆچی لە كاتی خۆیدا ئەنجامنەدرا؟ لەگەڵ ئەوەی وا ساڵێك تێدەپەڕێ بەسەر ئەنجامدانی هەڵبژاردنی ئەنجومەنی پارێزگاكان لە عێراقدا.
ئەمەش ئەوەی لێ‌ دەخوێنرێتەوە ئەوانەی نوێنەرایەتی كورد دەكەن لە بەغدا نە لێزانن و نە سیاسیشن و سیاسەتمەداریش نین، چونكە هەموو جارێك دوای ئەوەی بابەتێكی هەستیاری كۆمەڵگەیان بەسەردا تێدەپەڕێ‌، ڕۆشنبیران ئەوان لە مەترسی و چارەنوسی ڕەوشە هەستیارەكان وریا دەكەنەوە، وەك لە ماوەی ڕابردوودا چەندینجار ئەوەمان بینیوە ئەوەندەی رۆژنامەنوسانی ئازاد و رۆشنبیران رۆڵیان هەبوە لە مەسەلە چارەنوس سازەكان نیو ئەوەندە نوێنەرانی كورد ڕۆڵییان نەبینیووە، بۆ جارێكی تر دەمەوێ‌ بڵێم رۆشنبیرانی كورد دەوری كاریگەرییان هەبووە لە تەزاندنن و وریاكردنەوەی نوێنەرانی كورد بەوەی كە زۆرجار لەخەوێكی ئەوەندە قوڵ بەخەبەریان دێنن كاتێ بە خۆیان دەزانن كار لە كار ترازاوە...
بۆیە هەر جارەی كورد كە بە بابەتێكی لاوەكییەوە سەرقاڵكراوە لەو سەرەوە گۆڵێكیشی لێكراوە.