گەنجانی رانیە لەگەڵ تەواو بوونی بیناكەیان چالاكیەكیانیان فراوان دەبێت

‌‌دوای چەند ساڵ لە گرفتی شوێن‌و نەبوونی بینایەكی گونجاو بۆ چالاكیەكانی گەنجانی رانیە, بریارە لە ئایندەیەكی نزیكدا ئەم گرفتەیان بۆ چارەسەر بێت‌و بیناكەیان كە ئێستا نهۆمی دووەمی بۆ دروستكراوە بە شێوازێكی تازەو فراوان بكرێتەوە. ئەمەو سەرچاوەیەك لە سەنتەری چالاكی گەنجانی رانیە بە لێدوانی راگەیاند: كە لەسەر بودجەی حكومەتی هەرێمی كوردستان‌و بە بڕی نزیكەی سەد‌و حەوت ملیۆن دنیار نهۆمی دووەمی بیناكەمان بە دیزاین‌و شێوازێكی نوێ‌ بۆ جێ‌ بەجێ‌ كراوە كە بریتیە لە هۆلێك پێنج ژوور, بەمەش ئەو بینایەی كە ئێستا چالاكیەكانی تێدا ئەنجام دەدەین فراوان دەبێت‌و گرفتی شوێنمان تارادەیەك چارەسەر دەبێت. هەروەها چەند بەشێكی تازەش لە سەنتەرەكەماندا دەكەینەوە كە ئاستی چالاكیەكانمان فراوان دەكات.
پێویستە بگوترێت سەنتەری چالاكی گەنجانی رانیە پرۆژەیەكی منداڵپارێزی كوردستانە و ماوەی 9 ساڵە لە شاری رانیە كراوەتەوە, یەكێكە لەو پرۆژە سەركەوتوانەی كە خزمەتێكی زۆری بە گەنجانی ناوچەكە گەیاندوەو بەردەوامیش كۆمەلێك كارو چالاكی هەمەجۆر لە بوارەكەی خۆیدا ئەنجام دەدات, ئەم سەنتەری ماوەی 7 ساڵ لە خانوەیەكی كرێدا بووە كە بریتی بووە لە چەند ژوورێك, دواتر بینای كۆنی كتێبخانەی گشتی رانیەیان پێدراوە, ئێستاش ئەو بینایە فراوان كراوە‌و نهۆمی دووەمی بۆ دروستكراوە. كاری پرۆژەكە %95 تەواو بووەو بریارە لە چەند رۆژێكی ئایندەدا بكرێتەوە .