دێمە لای تۆ خۆشەویستم../ سۆران ئازاد- چۆمان

‌‌Soran_darbandy@yahoo.com

عەشق "شەماڵ *"ی وێران كرد و
حەسرەتەكانی پڕن لە نا ئومێدی.
كاتێ‌ خەیاڵی بەرۆكی ڕەنگەكان دەگرێت و
ڕەش سیمایان و سوور دابڕان و زەردی بیابان
تێكڕا گریانێك لە قوڕگی تابلۆكەی سەردەردێنی و
بەدەم ئازاری شەوانەی غوربەت هاوار دەكات:
(دێمە لای تۆ خۆشەویستم
دڵم ترپەترپییەتی لەتاو دووریت
دەبا بەس بێت ئەو هەموو ئازارە
دێمە لات و دەبینەوە دوو منداڵ
سورای پایسكلێك دەبین و لەدارستان پیاسە دەكەین.
بۆیەكمجار وەك دوو هەرزەكاری سەرشێت و عاشق
یەكتر لە باوەش دەگرین و
ماچ لە ئاسمانی عەشقمان دەبارێنین
جار جاریش تۆ سینەتم بۆ بكەوە و
من بەدەم شەهوەتێكی زۆرەوە بەخۆمت ڕادەمووسم.
بەس توخوا.. ئەمجارەیان نەخەڵەتیت بە دێو و درنجەكانی شار
خوا ئاگای لەتۆی فریشتە بێت.
تۆ ئەو ڕەنگەی لەدوور خۆتەوە بانگم دەكەیت و
منیش دەمێكە خەیاڵم بۆت ڕسكاوە و
هەرچەند بەدواتدا وێڵگەرم، ناتدۆزمەوە.
نازانم ئێستا تۆ لەكام گۆشە پووچەكانی ژیانیت..
دەترسم، كە دێمە لات ئیتر كەسەكەی جاران نەبیت
دەترسم، كە دێمە لات نیوەت لە لمی ئەنفال و
نیوەی تریشت لە چاوەڕوانی من، پیر بووبێت.
دەترسم، لێوت بەشی ماچێكی منی تێدا نەمابێت.
هێندەی ترسی ئیماندارێك لە دۆزەخ
من دەترسم ژیان تۆی پڕ كربێت لە ئازار.
ژیان تۆی لەسەر پێخەفە پیسەكانی ئەوان جێهێشتبێت.
ئاخر من دەزانم ئەو پووچییەی ژیان كەی بەشی بەختەوەریم دەكات.
ئاخر منی وەچەی تەپوتۆزگرتووی عەشق
ئاخر منی بێئومێد لە بەردەم سەرلێشێواویم
لەتەك غوربەتێكی پڕ لە حەسرەت
لەتاو ئەو دەنگانەی شەو لە بیابانەوە دێن و
بەدەم ڕاكێشانی من بۆ ڕەنگە مردوونیشینەكانییان
بەدەم كوشتنی من لەناڵەی رۆحە بیابانییەكان
منی پڕ لە ڕەنگی لم
منی پڕٍ لە تابلۆی تەواو نەكراوی بیابان
منی پڕ لە ئیقاعی جەلادەكان
منی پڕ لە ناڵە ناڵی ئاگر و
منی بێ خوا لە ئەنفال،
كەی بەشی باوەشێكی تۆ دەكەم..؟!
ئاخر دەترسم تۆش وەك من ڕەشبین بیت و
ژیان دەروازەی شادییەكانت دابخا.
بەڵام توخوا شەوێك لە باوەشم بگرە،
هەر هیچ نەبێ‌، لە باوەشی تۆی فریشتە بچمە قوڕگی مەرگی ئەوێ‌).

-----
*/ ئاماژەیەكە بۆ تابلۆی (دێمە لای تۆ خۆشەویستم) كە هی (شەماڵ عادیل سەلیم)ی شێوەكارە.