سندوقێكی رەش بۆ خراپترینەكان/ هەڵۆ مەرگەیی

‌‌halomargay@yahoo.com
لەگەڵ ئەوەی ناكرێ و زۆر نەشیاوە تەنانەت بە ناوی وەكیەكی لەمافە سروشتیەكاندا بیانوو بۆ گەورەیی و فەزڵی مرۆڤێك بەسەر مرۆڤێكی تر یا ئەوانی تردا بهێنرێتەوە، لای هەموانیش ئاشكرایە لەم سەردەمەدا مرۆڤی كوردیش هەمان ئەو مرۆڤە بچوككراوەو بێمافكراو نائاگامەندەی 80 بۆ 90 ساڵی رابردوو نیە، هەركەس و لایەك بێ‌ و بیەوێ‌ دڵخوازانە یاری بە هەست و كەسێتی و كەرامەتی بكات، كەچی ئەگەر چاوێك بەم دەرفەت و هەلومەرجە لەبارو سەرنجراكێشەی ئێستای باشوری وڵاتەكەماندا بگێرین، دەیەها بێدادی و نایەكسانی لەهەڵسەنگاندنەكاندا دەبینیت كە بەبێ‌ هیچ لێكۆڵینەوەو بیركردنەوەیەكی عەقڵانەو بابەتیانەو كارێكی لۆژیكی بەسەرماندا تێدەپەرن.
ئێمە ئەگەر ئەو باسە بەتەنها لەناو دنیایی رۆژنامەو رۆژنامەوانانی ئەم هەرێمەدا سنوردار بكەین دەبین ساڵ لەدوای ساڵ وێرای ئەوەی كێرڤی رەخنەو پێشلكارییەكان دژی ئازادییەكان و هەڵسورانی رۆژنامەنوسان بێپەروا لە هەڵكشاندایە، خودی ئەو دنیایەش لەم هەرێمەدا خۆی كەمی بەخۆی نەكردووەو تا دێ‌ زیاترو زیاتر خۆی دەخاتە ژێر پرسیاری پڕ لەوڵامی ئاڵۆزو مەترسیدارو پەلامارو بێمافكردنی خودی هاوپیشەكانی خۆیان، میراتگرەكانی ئەو پەرت و پەرێشانییەش ئاشكرایە ئەوانەن كە بێ‌ هیچ بنەمایەكی سەلمێنراو خەڵات و پەڵات بەناوی باشترینەوە بەسەر ئەم و ئەودا دەبەشێننەوە، وەك ئەوەی بڵێی لەناو ئەم دنیایەی رۆژنامەوانانیشدا نەك هەر خراپترین بگرە خراپییەكیش نەبێ‌ و روی نەدا بێت، ئێمەی كورد فێری ئەوە بووین ساڵانە مناسەب و بێ‌ مناسەبە ساڵانە خەڵكانێك كە لەبنەمادا ناتوانرێ‌ بخرێنە دەرەوەی مەرام و نیەتی تایبەتییەوە بەناوی یەكەمینەوە خەڵات دەكەین، كەچی تا دێ‌ خراپترینەكانمان زیاتر دەكەن و هەڵدەكشێن، تیبینی بكەن ساڵێ‌ رابردو ئەگەر بەساڵی گەشەكردنی جێنیو فرۆشانیش تەواو ئەژمار نەكرێت، نایشتوانرێ‌ گەشەكردنی دنیای تەندروستی ئەو بوارەی راگەیاند بسەلمێندرێ‌، بۆیە بۆ ئەوەی پێش بەو هەڵشانە چەمووشەی بواری راگەیاند بگرین من پێم وایە بۆ لەمەودوا دەبێ‌ دەسبەرداری بەشینەوەی خەلاتی یەكەمین بین و بێن لەبری ئەوە سندوقێكی رەش بۆ خراپترین و جنێوفرۆشەكان دابنێن و دایانبرین لەو دنیایەو رێگەنەدەین ئەوەی ویستی بێ‌ و زیان بە ناوناوبانگی رۆژنامەو رۆژنامەوانی و رۆژنامەنوسان و نوسەران و رۆشنبیران بگەیەنێت